So‘nggi yillarda O‘zbekistonda ta’lim sohasini isloh qilish davlat siyosatining eng ustuvor yo‘nalishlaridan biriga aylandi. Ayniqsa, professional ta’lim tizimini mehnat bozori talablari asosida qayta shakllantirish, xalqaro standartlarni joriy etish va yoshlarni raqobatbardosh kadr sifatida tayyorlashga qaratilgan keng qamrovli ishlar amalga oshirilmoqda. Bu jarayonda xalqaro ta’lim dasturlari asosida faoliyat yuritayotgan Pearson texnikumlari zamonaviy va samarali ta’lim modeli sifatida alohida ahamiyat kasb etmoqda.

O‘tkazilgan tahlil va so‘rovnomalar natijalari Pearson texnikumlarida ta’lim sifati, amaliy ko‘nikmalarni shakllantirish va mehnat bozoriga yo‘naltirilgan mexanizmlar boshqa davlat va nodavlat texnikumlariga nisbatan samaraliroq tashkil etilganini ko‘rsatdi.

Xususan, o‘qituvchilar kasbiy mahorati bo‘yicha ijobiy baholash Pearson texnikumlarida 90 foizni tashkil etgan bo‘lsa, boshqa texnikumlarda bu ko‘rsatkich 82 foizga teng bo‘lgan. Bu esa xalqaro dasturlar asosida faoliyat yuritayotgan ta’lim muassasalarida pedagoglarning malakasi, o‘qitish metodikasi va amaliyotga yo‘naltirilgan yondashuv yuqori darajada shakllanganini anglatadi.

Shuningdek, kredit-modul tizimining joriy etilganligi bo‘yicha ham Pearson texnikumlari ustunlik qilmoqda. Mazkur ko‘rsatkich Pearson texnikumlarida 75 foizni, boshqa texnikumlarda esa 59 foizni tashkil etgan. Bu esa ta’lim jarayonini xalqaro akademik standartlar asosida tashkil etish, talabalarning mustaqil ta’lim olish ko‘nikmalarini rivojlantirish hamda bilimlarni baholash tizimini takomillashtirishda muhim omil bo‘lib xizmat qilmoqda.

Zamonaviy infratuzilma ham ta’lim sifatining muhim mezonlaridan biri hisoblanadi. Laboratoriya va ustaxonalarning jihozlanganligi bo‘yicha Pearson texnikumlarida ijobiy baholash 94 foizni tashkil etgan bo‘lsa, boshqa texnikumlarda bu ko‘rsatkich 89 foiz bo‘lgan. Bu esa amaliy mashg‘ulotlarni real ishlab chiqarish muhitiga yaqinlashtirish, talabalarning kasbiy kompetensiyalarini mustahkamlash imkoniyatini yaratadi.

Zamonaviy texnologiyalarni o‘rganish imkoniyatlari bo‘yicha ham Pearson texnikumlari yuqori natijalarni qayd etgan. Xususan, mazkur ko‘rsatkich Pearson texnikumlarida 74 foiz bo‘lgan bo‘lsa, boshqa texnikumlarda 69 foizni tashkil etgan. Bugungi raqamli iqtisodiyot sharoitida IT texnologiyalar, innovatsion yondashuvlar va raqamli ko‘nikmalar mehnat bozorining asosiy talablaridan biriga aylanganini inobatga olsak, bu ko‘rsatkichlar alohida ahamiyat kasb etadi.

Dual ta’lim tizimi bo‘yicha xabardorlik darajasi ham Pearson texnikumlarida yuqori ekani kuzatildi. Pearson texnikumlarida mazkur ko‘rsatkich 80 foizni, boshqa texnikumlarda esa 76 foizni tashkil etgan. Bu esa ta’lim va ishlab chiqarish integratsiyasini kuchaytirish, talabalarni o‘qish jarayonidayoq ish muhitiga moslashtirish mexanizmlari samarali yo‘lga qo‘yilganini ko‘rsatadi.

Tadqiqot natijalariga ko‘ra, tadbirkorlik ko‘nikmalarini shakllantirish, bitirgandan keyin ish topish imkoniyatiga bo‘lgan ishonch hamda ishga joylashishda texnikum tomonidan ko‘rsatilayotgan amaliy yordam ko‘rsatkichlari ham Pearson texnikumlarida nisbatan yuqori ekani aniqlangan. Bu esa mazkur ta’lim muassasalarida faqat nazariy bilim emas, balki talabaning kelajakdagi kasbiy faoliyati va mehnat bozoridagi raqobatbardoshligiga ham alohida e’tibor qaratilayotganini anglatadi.

Pedagoglar o‘rtasida o‘tkazilgan so‘rovnomalar ham ta’lim sifati borasidagi farqlarni yaqqol namoyon qildi. Masalan, amaliy ko‘nikmalarni baholash shaffofligi bo‘yicha ijobiy baholash Pearson texnikumlarida 76 foizni tashkil etgan bo‘lsa, boshqa davlat va nodavlat texnikumlarda bu ko‘rsatkich 58 foiz bo‘lgan. Bu esa baholash jarayonlarida aniq mezonlar, xalqaro standartlar va kompetensiyaviy yondashuv samarali qo‘llanilayotganidan dalolat beradi.

IT infratuzilmasi va internet sifati bo‘yicha ham Pearson texnikumlari yuqori natija ko‘rsatgan. Xususan, mazkur ko‘rsatkichlar Pearson texnikumlarida 82 foizni, boshqa texnikumlarda esa 71 foizni tashkil etgan. Bugungi kunda raqamli ta’lim muhitini shakllantirish, onlayn platformalardan samarali foydalanish va elektron ta’lim resurslarini keng joriy etish ta’lim sifatini oshirishning muhim shartlaridan biri hisoblanadi.

Ish beruvchilar bilan hamkorlik darajasi bo‘yicha ham Pearson texnikumlari yuqori natijalarni qayd etgan. Pearson texnikumlarida mazkur ko‘rsatkich 98 foizni tashkil etgan bo‘lsa, boshqa texnikumlarda 94 foiz bo‘lgan. Bu esa o‘quv dasturlarini mehnat bozori talablari asosida shakllantirish, talabalarni amaliyot bilan ta’minlash va bitiruvchilarning bandligini oshirishda muhim ahamiyatga ega.

Shu bilan birga, xorijiy ta’lim dasturlari asosida kadrlar tayyorlash bo‘yicha ijobiy baholash Pearson texnikumlarida 95 foizni, boshqa texnikumlarda esa 90 foizni tashkil etgan. Pedagoglarni chet elda stajirovkaga yuborish tizimi bo‘yicha ham Pearson texnikumlari ustunlik qilmoqda — 77 foizga qarshi 63 foiz. Bu esa pedagoglarning xalqaro tajriba almashinuvida ishtirok etishi, zamonaviy metodikalarni o‘zlashtirishi va ta’lim jarayoniga innovatsion yondashuvlarni tatbiq etishiga xizmat qilmoqda.

Bugun O‘zbekistonda amalga oshirilayotgan islohotlarning asosiy maqsadlaridan biri — ta’lim tizimini xalqaro standartlar darajasiga olib chiqish, yoshlarni zamonaviy kasblarga tayyorlash va iqtisodiyot uchun raqobatbardosh kadrlar zaxirasini shakllantirishdan iborat. Pearson texnikumlari faoliyati esa ushbu maqsadlarni amaliy jihatdan ro‘yobga chiqarayotgan samarali modellardan biri sifatida namoyon bo‘lmoqda.

Tahlil natijalari shuni ko‘rsatmoqdaki, Pearson texnikumlarida xalqaro standartlar, amaliy ta’lim, raqamli texnologiyalar va mehnat bozoriga mos kadrlar tayyorlash mexanizmlari nisbatan samarali yo‘lga qo‘yilgan. Bu esa nafaqat professional ta’lim tizimi rivojiga, balki mamlakat iqtisodiyoti uchun malakali va zamonaviy fikrlaydigan mutaxassislarni tayyorlashga ham xizmat qilmoqda.