2023-yildan hozirga qadar — Oliy ta’limda sifatni ta’minlash agentliklarining xalqaro tarmog‘i (INQAAHE) — Boshqaruv kengashi direktori

2025-yildan hozirga qadar — Qozog‘iston Fan va oliy ta’lim vazirligi — Xalqaro strategik hamkorlar kengashi bosh kotibi

2025-yildan hozirga qadar — Yevrosiyo universitetlari ittifoqi (EURAS) — Boshqaruv kengashining xalqaro katta maslahatchisi

2025-yildan hozirga qadar — Turkiya Mikromalakalar assotsiatsiyasi — Xalqaro loyihalar koordinatori

2025-yildan hozirga qadar — TNE Institute — Ijroiya kengashi a’zosi

2022-yildan hozirga qadar — AQSh Oliy ta’limni akkreditatsiya qilish kengashi (CHEA-CIQG) — Xalqaro maslahat kengashi a’zosi

2026-yildan hozirga qadar — World Alliance for Microcredentials Foundation — Global Fellow (xalqaro ekspert)

Professor doktor Olgun Cicek oliy ta’lim, ta’lim sifatini ta’minlash va xalqaro hamkorlik sohalarida xalqaro miqyosda e’tirof etilgan ekspert, akademik va strategik rivojlanish bo‘yicha mutaxassis bo‘lib, Yevropa, Osiyo va Shimoliy Amerikada 30 yildan ortiq professional tajribaga ega. Uning faoliyati oliy ta’limni internatsionallashtirish, sifatni ta’minlash va akkreditatsiya, strategik hamkorlik, institutsional rivojlanish hamda global oliy ta’lim siyosati masalalarini qamrab oladi.

Hozirda u Oliy ta’limda sifatni ta’minlash agentliklarining xalqaro tarmog‘i (INQAAHE) Boshqaruv kengashi direktori sifatida faoliyat yuritib, tashkilotning xalqaro hamkorlik, akkreditatsiya va global rivojlanish tashabbuslariga hissa qo‘shmoqda. Faoliyati davomida u ko‘plab xalqaro tashkilotlar, sifatni ta’minlash agentliklari, universitetlar va oliy ta’lim tarmoqlarida rahbarlik hamda maslahatchilik lavozimlarida ishlagan.

Professor Cicek Markaziy va Sharqiy Yevropa oliy ta’limda sifatni ta’minlash agentliklari tarmog‘i (CEENQA)ning sobiq vitse-prezidenti hamda Xalqaro sifatni ta’minlash assotsiatsiyasi (IQA)ning sobiq prezidenti hisoblanadi. Shuningdek, 2022-yildan buyon AQSh Oliy ta’limni akkreditatsiya qilish kengashi (CHEA) huzuridagi Xalqaro sifat guruhi (CHEA-CIQG) Xalqaro maslahat kengashi a’zosi sifatida faoliyat yuritmoqda.

Uning xalqaro tajribasi turli mamlakatlarning oliy ta’lim organlari va tashkilotlaridagi maslahatchilik faoliyatini ham qamrab oladi. Hozirda u Qozog‘iston Fan va oliy ta’lim vazirligi huzuridagi Xalqaro strategik hamkorlar kengashi bosh kotibi, Yevrosiyo universitetlari ittifoqi (EURAS) Boshqaruv kengashining xalqaro katta maslahatchisi hamda Turkiya Mikromalakalar assotsiatsiyasining xalqaro loyihalar koordinatori sifatida faoliyat olib bormoqda.

Bundan tashqari, professor Chichek Malta Oliy va qo‘shimcha ta’lim boshqarmasining Sifatni ta’minlash qo‘mitasi a’zosi hamda Lyublyana universiteti (Sloveniya)da Yevropa Ittifoqi tomonidan moliyalashtiriladigan ilmiy loyihalarda katta ilmiy xodim sifatida faoliyat yuritadi. U tashqi sifatni ta’minlash, akkreditatsiya, institutsional baholash, mikromalakalar (micro-credentials), umrbod ta’lim va transmilliy ta’lim yo‘nalishlaridagi ekspert sifatida keng e’tirof etilgan.