Xorazm viloyatida faoliyat yuritayotgan Al-Xorazmiy universitetida yangi o‘quv yili uchun rejalashtirilgan beshta ta’lim dasturini maxsus davlat akkreditatsiyasidan o‘tkazish jarayonlari izchil davom etmoqda. Bu jarayon oliy ta’lim muassasasining ilmiy salohiyati, zamonaviy infratuzilmasi hamda xalqaro talablarga mos ta’lim sifatini ta’minlash yo‘lidagi muhim qadamlardan biri sifatida e’tirof etilmoqda.

Ayni kunlarda universitetda “Kiberxavfsizlik injiniringi” ta’lim yo‘nalishi hamda “Sun’iy intellekt” mutaxassisligi bo‘yicha ishlab chiqilgan ta’lim dasturlari ekspertlar guruhi tomonidan joyiga chiqqan holda batafsil o‘rganildi. Mazkur yo‘nalishlar bugungi raqamli davrning eng dolzarb va istiqbolli sohalaridan sanalib, ularni sifatli yo‘lga qo‘yish mamlakatning texnologik taraqqiyoti uchun muhim omil hisoblanadi.

Tashqi baholash bosqichi doirasida ekspertlar tomonidan ta’lim dasturlarining mazmuni, o‘quv rejalari, fan dasturlari hamda ularning amaliyot bilan integratsiyasi chuqur tahlil qilindi. Shuningdek, talabalarni zamonaviy bilim va ko‘nikmalar bilan qurollantirish darajasi, professor-o‘qituvchilarning ilmiy salohiyati hamda ta’lim jarayoniga innovatsion texnologiyalarni joriy etish holatiga alohida e’tibor qaratildi.

Akkreditatsiya jarayonining muhim jihatlaridan biri sifatida universitetning moddiy-texnik bazasi ham atroflicha o‘rganildi. Xususan, kafedralar faoliyati, axborot-resurs markazi, zamonaviy kompyuter xonalari, laboratoriyalar hamda raqamli ta’lim tizimining imkoniyatlari ekspertlar tomonidan sinchkovlik bilan baholandi. Bu esa ta’lim muassasasida talabalar uchun yaratilayotgan sharoitlar zamon talablari darajasida ekanini namoyon etadi.

Bugungi globallashuv va texnologiyalar keskin rivojlanayotgan davrda kiberxavfsizlik va sun’iy intellekt kabi yo‘nalishlarning rivoji har bir davlatning strategik ustuvor vazifalaridan biriga aylanmoqda. Shu nuqtai nazardan, Al-Xorazmiy universitetida ushbu sohalar bo‘yicha yangi avlod mutaxassislarini tayyorlashga qaratilgan ta’lim dasturlarining shakllantirilayotgani alohida ahamiyat kasb etadi.

Ta’kidlash joizki, davlat akkreditatsiyasi nafaqat ta’lim sifatini nazorat qilish, balki oliy ta’lim muassasasining raqobatbardoshligini oshirish, xalqaro standartlarga moslashuvi hamda talabalar uchun keng imkoniyatlar yaratishda muhim mexanizm hisoblanadi.

Universitet jamoasi tomonidan olib borilayotgan izchil islohotlar va zamonaviy yondashuvlar ushbu ta’lim maskanining kelajakdagi nufuzini yanada mustahkamlashi kutilmoqda.

Akkreditatsiya yakunlari esa alohida e’lon qilinadi.